युवराज पौडेल
स्याङ्जा,१७ माघ । नेपाल विद्यार्थी सङ्घ फेदीखोलाद्वारा दोस्रो रिमा स्मृति कप फुटबल प्रतियोगिताको उद्घाटन गरिएको छ । सेभेन ए साइड खुला प्रतियोगिताको बुधबार फेदीखोला रङ्गशालामा उद्घाटन गरिएको हो ।
उक्त प्रतियोगिताको उद्घाटन गर्दै प्रमुख अतिथि नेपाल विद्यार्थी सङ्घ स्याङ्जाका सभापति गौरव प्रधानले खेलद्वारा व्यक्तिमा अनुशासन र जिम्मेवारीपनको विकास हुने भएकाले नेबिसङ्घले युवाहरुलाई खेलमा जोड्न चाहेको धारणा राख्नुभयो । उहाँले नेपाल विद्यार्थी सङ्घ स्याङ्जाले युवा विद्यार्थीहरुको व्यक्तित्व विकास हुने खालका सिर्जनात्मक क्रियाकलापहरु गरिरहेको बताउँदै भविष्यमा अझै राम्रा कार्यक्रमहरु युवाहरुका बिचमा लैजाने प्रतिबद्धता व्यक्त गर्नुभयो ।
उक्त उद्घाटन कार्यक्रममा विशिष्ट अतिथि नेपाली काङ्ग्रेस फेदीखोला गाउँपालिका सभापति महेन्द्र थापा, स्वतन्त्र विद्यार्थी युनियन त्रिभुवन आदर्श बहुमुखी क्याम्पसका सभापति सविन रेग्मी, नेबिसङ्घ क्याम्पस इकाइका सभापति सुजिल श्रेष्ठ, स्ववियु उपसभापति महादेव क्षेत्री, स्ववियु सदस्य असिम भण्डारी र अनुप ढकाल लगायतको उपस्थिति रहेको थियो ।
नेबिसङ्घ फेदीखोलाका अध्यक्ष सन्देश जिसीको अध्यक्षतामा सम्पन्न उद्घाटन कार्यक्रमा विभिन्न ४ समूहहरुका बिचमा खेल भएको छ । उक्त फुटबल प्रतियोगिता तिन दिनसम्म सञ्चालन हुने छ ।
